Coa chegada das vacacións de Semana Santa, dende o CIMIX ofrecémosvos unha programación cultural activa dirixida a todos os públicos. Do xoves 2 ao domingo 5 de abril, ampliaremos o noso servizo abrindo en horario de mañá e tarde (de 10:00 h a 14:00 h e de 16:30 h a 20:30 h), para que poidades achegarvos ás instalacións da nosa antiga Real Fábrica de Fariñas.
A nosa novidade principal desta tempada é a actividade familiar Ollo ao ovo!, unha procura de ovos de Pascua polas nosas instalacións. Nela, o público infantil poderá explorar os diferentes recunchos do muíño nun xogo que fomenta a creatividade e o descubrimento deste espazo histórico.
Xunto a esta estrea, recuperamos a proposta María conta, un percorrido audioguiado deseñado para que vivades unha experiencia de visita inmersiva. A través do relato narrado por unha muller do século XVIII, acompañarémoste mentres percorres o muíño e coñeces a historia e o funcionamento da fábrica dende unha perspectiva íntima e reflexiva.
Estas propostas temporais conviven coa nosa oferta estable, que inclúe os nosos coñecidos obradoiros, o desafío de Escape Room Fariña en marcha! e as visitas guiadas coas que vos axudaremos a descubrir o funcionamento desta xoia do patrimonio industrial galego.
Se queredes asegurar a vosa praza, xa podedes facelo a través da nosa plataforma de reservas aquí na web cimixnaron.gal, onde tedes detallados todos os horarios e modalidades de visita dispoñibles para estas datas.
Agardámosvos!